火山爆發

我每天都忙到七孔噴煙，今早終於火山爆發。今次輪到我丙人，雖然沒有丙半粒鐘，但都有5分鐘。

話說一個月前跟同事交帶好要砌一樣野，當係砌架火箭先啦。講好4月1號要交個雛型給我測試，結果話遲兩天才可起貨，即長假期後。怎知放假後回來完全無影，又無交待，直至昨天我追問進展，硬要他們今天一定要給我，才有點眉目。怎知今早他們跟我說只砌起了7-8成，我一聽已經有點火起。跟著解釋的第一個原因是因為某部門同事還未聯絡他們，所以某一部份未搞掂。甘我D火就即刻黎啦。無野呀，我一個月前已跟對方接了洽，對方的阿頭話無問題可以進行，但人地成個月無跟進，甘你都唔識出聲？你坐緊個個唔係新仔位黎架！就算你唔想出面，你都要同我講聲等我跟進下啦。架火箭26號要出街架啦，砌都未砌好，仲要測試，跟著實又要再改，甘點保證質素呀？仲有我黎緊呢個星期是超忙，都唔知點擰D時間出來再搞呢壇野！

不過我今早丙完人，個心都有D唔安樂，因我很少在OFFICE裡如此發惡。現在回想，覺得自己好像有了某人的影子。唔，我唔想甘呀！不過，我呢D燥底人又有時．．．唉！還有，今個下午，我覺得D同事好似開始對我敬而遠之，是否我敏感而已？！

今晚恆恆爸爸回來我跟他說了這件事，知他的第一個反應是什麼？他即跟小鍋貼說：「喂，媽媽今晚心情唔好，你醒定D呀！」頂，你好野！